Rebolusyon sa Katilingban

Matod ni David Crystal, usa ka lingwista, nga ang talimbigit (internet) usa ka rebolusyon sa katilingban ug sa usa pod ni ka rebolusyon sa nataran sa tuonpinulongan (linguistics).

Rebolusyon, dakong kausaban, ba ang gapanghitabo karon sa atong katilingban?

Dagitwanang (cyberspace)

Wa damha, nausab sa hingpit ang atong kalibotan, nadugangan og dagitwanang,
ang dagitab nga kawanangan. Sa dagitwanang, migamay ang kalibotan, dili na igsapayan ang dapit sa iyang kalayo. Dali ug paspas na ang pagduaw sa mga dapit o buhatan, diha sa pagduaw sa mga balayan sa dagitwanan. Dali na lang mailhan o mahibaw-an ang ginapangita nga kasayoran agi sa mga himan sa sa pag-pangita (search engine), sama sa Google.

Nahilambigit na pag-ayo ang tibuok kalibotan, tali sa panaglambigit sa mga dagitok (computer) sa lain-laing tawo o grupo sa lain-laing dapit, sa gitawag karon nga talimbigit (internet).

Ang pisikal ug ang simbolikal nag-abot, ang kalibotang pisikal nahiusa diha sa kalibotan sa pinulongan sa tawo. Ug karon, dugang kalibotan sa dagitwanang ang nahilambigit sa namathan nato nga kalibotan.